၂၀၂၅ ခုနှစ်၊ မေ ၂၀ ရက်က ပဲခူးတိုင်းဒေသကြီး၊ ပဲခူးမြို့နယ်၌ စက်သုံးဆီများ တရားမဝင် ရောင်းချသူ အမျိုးသား တစ်ဦးနှင့် အမျိုးသမီး တစ်ဦးတို့အား ဖမ်းဆီးအရေးယူထားကြောင်း သိရသည်။
ဖြစ်စဉ်မှာ မေ ၂၀ ရက် မွန်းလွဲ ၁ နာရီတွင် ပဲခူးတိုင်းဒေသကြီး၊ ပဲခူးမြို့နယ်၊ ညောင်အင်း ကျေးရွာ၌ စက်သုံးဆီများ တရားမဝင်လက်ဝယ်ရောင်းချနေကြောင်း သတင်းအရ ပဲခူးမြို့နယ်ရဲတပ်ဖွဲ့မှ တပ်ဖွဲ့ဝင်များ၊ ရေနံထွက်ပစ္စည်းကြီးကြပ်စစ်ဆေးရေးအဖွဲ့ဝင်များပါဝင်သော ပူးပေါင်းအဖွဲ့သည် သွားရောက်စစ်ဆေးခဲ့ရာ အဆိုပါကျေးရွာနေ ဒေါ်နွယ်နွယ်ဝင်း(၅၀)နှစ်၏နေအိမ်မှ ပလတ်စတစ်ပုံးဖြင့် ထည့်ထားသော 92 ဓာတ်ဆီ ၅ ဂါလန်ခန့်၊ ၁ လီတာဆန့် ရေသန့်ဘူးဖြင့် 92 ဓာတ်ဆီ ၅ ဘူးနှင့် ဆက်စပ်ပစ္စည်းများဖြင့်လည်းကောင်း။
အလားတူ မွန်းလွဲ ၂ နာရီ ၄၀ မိနစ်တွင် အဆိုပါကျေးရွာနေ သက်ဆွေ(၅၀)နှစ်၏ နေအိမ်မှ 92 ဓာတ်ဆီ ၃၀ ဂါလန်ပါ ပေပါ ၁ လုံးနှင့် ဆက်စပ်ပစ္စည်းများဖြင့်လည်းကောင်း တွေ့ရှိဖမ်းဆီး ရမိခဲ့သဖြင့် ဒေါ်နွယ်နွယ်ဝင်းနှင့် သက်ဆွေတို့နှစ်ဦးအား ပဲခူးမြို့၊ အမှတ်(၃)နယ်မြေရဲစခန်း၌ ရေနံနှင့် ရေနံထွက်ပစ္စည်းဆိုင်ရာဥပဒေပုဒ်မ ၃၇ ဖြင့် အမှုဖွင့်အရေးယူထားကြောင်း သတင်းရရှိပါသည်။
ပဲခူးတိုင်းဒေသကြီး၊ ပဲခူးမြို့နယ်၌ စက်သုံးဆီများ တရားမဝင်ရောင်းချသူ အမျိုးသား တစ်ဦးနှင့် အမျိုးသမီး တစ်ဦးတို့အား ဖမ်းဆီးအရေးယူမှု မှတ်တမ်းဓာတ်ပုံ။
