၂၀၂၅ ခုနှစ်၊ မေ ၂၀ ရက်က ရန်ကုန်တိုင်းဒေသကြီး၊ တိုက်ကြီးမြို့နယ်၌ ၂၂ ဘီး မော်တော်ယာဉ်မှ လမ်းဖြတ်ကူးသူအား ဝင်ရောက်တိုက်မိမှုကြောင့် လမ်းဖြတ်ကူးသူ အမျိုးသား တစ်ဦး သေဆုံးသွားကြောင်း သိရသည်။
ဖြစ်စဉ်မှာ မေ ၂၀ ရက် ည ၁၁ နာရီ ၅၅ မိနစ်တွင် ရန်ကုန်တိုင်းဒေသကြီး၊ တိုက်ကြီးမြို့နယ်၊ ဥက္ကံမြို့၊ ဘွက်ကုန်းကျေးရွာလမ်းဆုံအနီး ရန်ကုန်-ပြည်လမ်း၊ မိုင်တိုင်အမှတ် ၆၇ မိုင်နှင့် ၆၈ မိုင်ကြား၌ ယာဉ်တိုက်မှုဖြစ်ပွားကြောင်း သတင်းအရ ဥက္ကံနယ်မြေရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့မှ သွားရောက်စစ်ဆေးရာ အဆိုပါလမ်းအတိုင်း တောင်မှ မြောက်သို့ ပဲခူးတိုင်းဒေသကြီး၊ ဇီးကုန်းမြို့၊ ရန်ကင်းရပ်ကွက်နေ ရင်ထွေး(၃၆)နှစ် မောင်းနှင်လာသော MDY-1/7H-XXXX NISSAN DIESEL ၂၂ ဘီး အဖြူရောင်မော်တော်ယာဉ်သည် အခင်းဖြစ်နေရာအရောက်၌ အရှိန်မထိန်းနိုင်ဘဲ လမ်းဖြတ်ကူးသူ ဥက္ကံမြို့၊ ဘုရင့်နောင်ရပ်ကွက်နေ ဦးစိုးဝင်းသန်း(၅၂)နှစ်အား ဝင်ရောက်တိုက်မိခဲ့သဖြင့် ထိခိုက်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့ကြောင်းနှင့် ရင်ထွေး အား ဥက္ကံနယ်မြေ ရဲစခန်း ယာဉ်(ပ)၆/၂၀၂၅၊ ရာဇသတ်ကြီးပုဒ်မ ၃၀၄-က ဖြင့် အမှုဖွင့်အရေးယူထားကြောင်း သတင်းရရှိပါသည်။
ရန်ကုန်တိုင်းဒေသကြီး၊ တိုက်ကြီးမြို့နယ်၌ ၂၂ ဘီး မော်တော်ယာဉ်မှ လမ်းဖြတ်ကူးသူအား
ဝင်ရောက်တိုက်မိခဲ့မှုကြောင့် လမ်းဖြတ်ကူးသူ အမျိုးသား တစ်ဦး သေဆုံးမှု မှတ်တမ်းဓာတ်ပုံ။
