၂၀၂၅ ခုနှစ်၊ မေ ၂၅ ရက်က ရှမ်းပြည်နယ်၊ ကလောမြို့နယ်၌ ခရီးသည်တင်မော်တော်ယာဉ်မှ အရှိန်မထိန်းနိုင်ဘဲ ၎င်းအရှေ့မှ မောင်းနှင်နေသည့် ၂၂ ဘီး မော်တော်ယာဉ်အား ဝင်ရောက်တိုက်မိမှုကြောင့် အမျိုးသား သုံးဦး ထိခိုက်ဒဏ်ရာရရှိခဲ့ကြောင်း သိရသည်။
ဖြစ်စဉ်မှာ မေ ၂၅ ရက် ည ၁၁ နာရီ ၃၀ မိနစ်တွင် ရှမ်းပြည်နယ်၊ ကလောမြို့နယ်၊ ပြည်ထောင်စုလမ်းမကြီး မိုင်တိုင်အမှတ် ၇၆ မိုင် ၁ ဖာလုံနှင့် ၂ ဖာလုံကြား၌ ယာဉ်တိုက်မှု ဖြစ်ပွားကြောင်း သတင်းအရ အမှတ်(၁၁၇)ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များက သွားရောက် စစ်ဆေးခဲ့ရာ ပြည်ထောင်စုလမ်းမကြီးအတိုင်း ကလောမြို့မှ အောင်ပန်းမြို့သို့ မန္တလေးတိုင်းဒေသကြီး၊ အမရပူရမြို့နယ်၊ အမှတ်(၁၀)ရပ်ကွက်နေ မင်းမင်းဦး(၃၂)နှစ် မောင်းနှင်ပြီး ပဲခူးတိုင်းဒေသကြီး၊ ပေါက်ခေါင်းမြို့၊ နီပါးဆေးရွာနေ ဖြိုးဝေစိုး(၁၉)နှစ်နှင့် ရှမ်းပြည်နယ်၊ အေးသာယာမြို့နေ ညီညီလွင် (၃၃)နှစ်တို့ နှစ်ဦးသည် ယာဉ်နောက်လိုက်အဖြစ် လိုက်ပါလာသည့် YGN-20/5P-XXXXX HIGER BUS ခရီးသည်တင် အဖြူရောင်မော်တော်ယာဉ်သည် LUCKY-7 စက်သုံးဆီဆိုင်အနီးအရောက်၌ ၎င်းအရှေ့မှ ပဲခူးတိုင်းဒေသကြီး၊ ပြည်မြို့၊ နဝဒေးရပ်ကွက်နေ အောင်ဖြိုးပိုင်(၃၃)နှစ် မောင်းနှင်သည့် MDY-14/ 7R-XXXX MAN TGX ၂၂ ဘီး အဖြူရောင်မော်တော်ယာဉ်အား အရှိန်မထိန်းနိုင်ဘဲ အနောက်မှ ဝင်ရောက်တိုက်မိခဲ့သဖြင့် ခရီးသည်တင်မော်တော်ယာဉ်၏ ယာဉ်မောင်းနှင့် ယာဉ်နောက်လိုက်များ ဖြစ်ကြသည့် မင်းမင်းဦး၊ ဖြိုးဝေစိုးနှင့် ညီညီလွင်တို့တွင် ထိခိုက်ဒဏ်ရာများ ရရှိခဲ့သောကြောင့် မင်းမင်းဦး အား ကလောမြို့မရဲစခန်း ယာဉ်(ပ)၉/၂၀၂၅၊ ရာဇသတ်ကြီးပုဒ်မ ၂၇၉/၃၃၇/၃၃၈ ဖြင့် အမှုဖွင့်အရေးယူထားကြောင်း သတင်းရရှိပါသည်။
ရှမ်းပြည်နယ်၊ ကလောမြို့နယ်၌ ခရီးသည်တင်မော်တော်ယာဉ်မှ အရှိန်မထိန်းနိုင်ဘဲ ၎င်းအရှေ့မှ မောင်းနှင်နေသည့် ၂၂ ဘီး မော်တော်ယာဉ်အား ဝင်ရောက်တိုက်မိမှုကြောင့် အမျိုးသား သုံးဦး ထိခိုက် ဒဏ်ရာရရှိမှု မှတ်တမ်းဓာတ်ပုံ။
