ဆိပ်ဖြူမြို့နယ်ရှိ Mytel ဆက်သွယ်ရေးတာဝါတိုင်အား PDF အမည်ခံ အကြမ်းဖက်အဖွဲ့က မိုင်းထောင် ဖောက်ခွဲဖျက်ဆီး

     နိုင်ငံရေးအစွန်းရောက် အကြမ်းဖက်သမားများအနေဖြင့် အများပြည်သူများ ဆက်သွယ်ရေး ပြတ်တောက်စေရန် ရည်ရွယ်၍ ဖုန်းဆက်သွယ်ရေးတာဝါတိုင်များအား မိုင်းထောင်ဖောက်ခွဲဖျက်ဆီး ခြင်းများအား လုပ်ဆောင်လျက်ရှိပါသည်။
    ထိုသို့ လုပ်ဆောင်လျက်ရှိရာ ၂၀၂၄ ခုနှစ်၊ ဧပြီ ၂၇ ရက် ညနေ ၄ နာရီခွဲတွင် မကွေးတိုင်း ဒေသကြီး၊ ဆိပ်ဖြူမြို့နယ်၊ ဂျုတ်ချောင်းလေးကျေးရွာလမ်းခွဲရှိ Mytel ဆက်သွယ်ရေးတာဝါတိုင်အား PDF အမည်ခံ အကြမ်းဖက်အဖွဲ့ အင်အား ၃၀ ဦးခန့်က ဆိုင်ကယ်များဖြင့် ရောက်ရှိလာပြီး တာဝါတိုင်အား မိုင်းထောင်ဖောက်ခွဲဖျက်ဆီးသွားခဲ့၍ ပေါက်ကွဲမှုကြောင့် အဆိုပါတာဝါတိုင်ရှိ ဆက်သွယ်ရေးစက်ကြီး တစ်လုံး၊ 50AH/48 V ဘက်ထရီအိုး ခြောက်လုံးနှင့် ဂါလံ ၁၀၀၀ ဆံ့ဆီတိုင်ကီ တစ်လုံးတို့ ပျက်ဆီး ဆုံးရှုံးခဲ့ကြောင်း သိရသည်။
    အထက်ပါဖြစ်စဉ်မှ Mytel ဆက်သွယ်ရေးတာဝါတိုင်အား မိုင်းထောင်ဖောက်ခွဲဖျက်ဆီး သွားခဲ့သည့် အကြမ်းဖက်သမားများအား ဖမ်းဆီးရမိနိုင်ရေးနှင့် နယ်မြေတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များအား ဆက်လက်ဆောင်ရွက်လျက် ရှိကြောင်း သတင်းရရှိသည်။